قصيدة ” براءة ” / مظفر النوّاب
مظفّر النواب* ( العراق ) الأحد 29/10/2017 م …
* شاعر ومناضل شيوعي عراقي …
براءة الأم …
يا بني ضلعك من رجيت
لضلعي جبرته وبنيته
يا ابني خذني لعرض صدرك
واحسب الشيب اللي من عمرك جنيته
يا بني طش العمى بعيني
وجيتك بعين القلب أدبي على الدرب ألمشيته
شيلةالعلاكة يا بني
تذكر جتوفي بلعب عمرك عليهن
سنة وكفوفك وردتين على رأسي
وبيك أناغي كل فرح عمري لنسيته
يا اللي شوفك يبعث الماي الزلال بعودي وأحيا وأنا ميتة
أبيض عيونك لبن صدري
وسواد عيونك الليل اللي عد مهدك بجيته
وأبنك التوّه يناغي الخرز بالكاروك ياا بني
كتلة لا تخاف اليتم جده
اللي ما مش أبو عده
الحزب أبوه الحزب بيته
كتله ياا بني يا وليدي من تكبر على الأيام
تلكه حزام أبوك الماطواني وما طويته
تلكه منه خطوط أضمهن حدر ضلعي
لحد ما موت بعز على السر الحويته
يا عمد بيتي وكمر ليلي وربيع الشيب والعمر الجنيته
جيت أهزك يا عمد بيتي
لا يكون الدهر ضعضع عظم منك للمذله للخيانة
وساومت جرحك على الخسة وجفيته
يا بني خلي الجرح ينطف
خله يرعف خله ينزف
يا بني الجرح اليرفض شداده علم ثوار يرفرف
يا بني ارضى الجلب يرضع من حلبيي
ولا ابن يشمر لي خبزه من البراءة
يا بني يأكلني الجرب عظم ولحم
وتموت عيني ولا دناءة
يا بني ها الأيام يفرزنها القحط أيام محنة
يا بني لا تثلم شرفنا
يا بني يا وليدي البراءة تظل مدى الأيام عفنة
تدري يا بني بكل براءة
كل شهيد من الشعب ينعاد دفنه
وخلي إيدك على شيبي واحلف بطاهر حليبي
كطرة كطرة وبنظر عيني العميته
قلي ما يندار رجمي و أنت أمي وذاك حزبي
وعزأبوي المالواني وما لويته
قلي ما اهدم حزب بيدي بنيته
**************
براءة الأخت ….
خوية كابلت السجن حر وبرد
ليلي ونهاري
اتحملت لاجلك شتايم على عرضي
واشعلت بالليل ناري
تالي تهتكني بخلك وصلة جريدة
كرت عيونك ياخويه بهاي جازيت انتظاري
بهاي أكابل كل إخت تنتظر منك ثار يا خويه لعرضها
بهاي اكابل امهات الناس وهمومي افضها
جنت اررضة تدوس بعظامي واكلك حيل رضها
جنت ارضه تذبح ابطني جنيني
ولا براءة عار متبركع تجيني
ولك كون الكاع تبلعني وشخبرالناس والينشد شكله
شلون عيني اتجابس عيون المحلة
اشلون اوصفك وانته كلك عار وذله
بعد ما لك عرف ويانه وخبزلا تصل يمنه
هاك اخذ عار الجريده
ولف ضميرك والكرامه وعار اسمنه
مثل ما تبريت من شعبك تبرينا من اسمك
ويا شعب هذا التشوفه موش ابنه موش لبنه
التعليقات مغلقة.